利申：這是火星醫院的虛構情況，與地球上任何一間醫院並無關係。如有雷同，實為不幸。對不起，這篇文充滿著口語和粗口，因為真係好嬲，請見諒。
－－－
到底Admission Block 要玩到幾時？
而加已經係夏天，仲成個冬天咁，一開波有50-70 個病人迫在急症室度，等樓上病房的床位。
我明白樓上的同事都好慘，加床加到電視機底、走廊邊、廁所門口，但係我唔明白點解要急症室食晒成個包袱。
在我們度等的病人，最多係內科，有時有幾個骨科，衰起上來，連外科同腦外科都要等。
因為病人仲在急症室，如果情況有乜變化，都仲係你急症室醫生既責任。
你前面有海量的新病人未睇，後面又有一堆睇左決定要入院的病人隨時變差，個感覺就係揹住個計時炸彈來衝鋒陷陣一樣。
就講今日，我前面一個鐘兩三個R 房，你後面又無啦啦推個唔醒的出來，喂大佬，腹背受敵我點＿樣做呀？
每次有起等入院，就要臨時拉夫在上面抽調姑娘來，最慘就係每次調來的姑娘批批都唔同，次次都要重新教一次。另外，仲有果個乜鬼三年抱兩計劃，每年半就將我啲岩岩上手，幫到忙的姑娘仔調走，又換一班新的來，然後又要教一次，為他人作嫁衣裳。調來調去，又唔尊重護士的意願，數下手指，今年最少走左六七個有三年經驗的護士。
係，今年7 月會人頭會多6 個新醫生，我都好期待佢地快點來幫忙，但其實只不過係僅僅夠補返之前走左果啲醫生的空缺，而且，仲要開新服務：開多一個急症病房，自己哽晒呢堆本身係人地既病人！
十個煲得6 個蓋，而加比多3 個蓋你，以為好好啦，點知對唔住，其實要再加多4 個煲，點掂呀？
老老實實，出得黎行，做得醫生，個中心思想、核心價值都係為左病人好。
係，我同意，有需要的時候做多少少，唔好計較咁多，當然無問題。
但而加係長貧難顧呀大佬！上面長期唔夠人，唔夠病房，咁係咪長期要由急症室負擔起人地科的責任呢？
家陣個赤裸裸的現實係，有一堆應該入院由專科去睇的病人，變左變入急症病房，由返急症室醫生去睇，個包袱由我地承擔左，咁上面的專科呢？
對你就講返聲「多謝晒喎」「辛苦晒喎」，擰轉背後就好開心咁有急症室咁抵得諗包左底，平靚正咁搞掂左果堆原本係自己要收、要負責的病人。
仲有一樣小事，我唔明白點解要我們的姑娘回答病人或家屬同一番的問題幾十幾百次，而唔簡簡單單比份「FAQ單張」對方。
「幾時先有病房呀？」
「我地等緊咩呀？」
「幾時有報告呀？」
「食唔食得野呀？」
早在三四個月前，我已經提出過可以比啲溫馨提示對方，但結果就係「意見接受」，我地的姑娘繼續重複答呢D 問題，浪費晒可以專心做護理的時間。
點解我要做得咁辛苦？
做得好，睇得多症係應份！OK，無獎，都算喇。
有時真係咁多病人，一個唔小心衰左，我都唔想嫁大佬！著得起件衫唔通想出來害人咩？
不過sorry，佢又風險通報你呀，出晒mass mail 比大家叫其他同事小心呀，借鑑呀咁，雖然話唔開名呀互相學習呀，不過你返工都覺得好像無著衫咁，覺得個個都知自己的瘀野，真係咁辛苦都唔知為乜。
同我同班的同學，在大離島醫院度做，一個星期的R 房數目，10 隻手指數得晒，而我一更八個鐘，R 房的數目已經要數埋腳趾。
大家都係咁多錢糧，＿＿＿＿（四字），點解我要做得咁辛苦？
我仲有個同學已經放棄埋急症，投入私營醫療集團，嘩＿＿＿＿（四字），多我四份一糧添！
係，做醫生唔係講錢，又講真，醫到人的成功感可以支撐到我，但問題係Admission Block 呢個加重我地工作壓力的包袱一日未解除，一日都仲係返工的負能量。
用返黃子華的魚蛋論，你又比10 蚊雞，我又比10 蚊雞，點解人地有六粒，我就得四粒？咁點解我唔去10 蚊六粒果間先？
為病人一句多謝，為見到病人好返，無錯，係好有成功感的，但係當你日日在戰場的環境，見住海量的病人，始終有一日會玩完。
最後，見住果千幾二千億係咁倒落咸水海，而唔係起間新醫院，請多D 醫生護士，我真係忍唔住要講一句：D7689！
講完！
Search